9f. Den Treema um e am Pluriel vu franséische Wierder

1. Bei Wierder op -é kënnt am Pluriel en -en drun. Wann den n duerch d’n-Reegel ewechfält, kënnt en ë nom é:
   Vill Caféen hunn owes op. Déi meescht Caféë sinn Hellegowend zou.
   Mir hu vill Chargéen am Lycée. D’Chargéë kommen all erëm.
2. Bei Wierder op -ée kënnt am Pluriel en -ën drun:
   Chargée – Chargéeën – Chargéeë sichen
   Lycée – Lycéeën – Lycéeë bauen
   Musée – Muséeën – Muséeë besichen
3. En -ën kënnt och do, wou eng Verwiesslung méiglech ass:
   en Enseignant, eng Enseignante, vill Enseignanten an Enseignanteën
   en Devis – zwee Devisen, eng Devise – zwou Deviseën
   e Cousin – zwee Cousinen, eng Cousine – dräi Cousineën
4. Den Treema gëtt just dann op de leschten e gesat, wann eng Verwiesslung vum Pluriel mam Singulier méiglech ass.
   Dat ass dann de Fall, wann duerch d’n-Reegel den n vum Pluriel ewechfält:
   d’Ficelle schneiden, d’Ficellë schneiden
   d’Poubelle réckelen, d’Poubellë réckelen